Geschicht vun der Partei déi Lénk zu Lëtzebuerg
Grënnung an déi éischt Joren (1994-1999)
D’Origine vun déi Lénk kënne bis an déi fréizäiteg 1990er Jore verfollegt ginn. Wärend dem Kale Krich hunn d’antikommunistesch Campagnen, déi vun den Amerikaner weltwäit gefouert goufen, d’Opkomme vun der neoliberaler Siicht op d’Welt gefuerdert a kommunistesch a sozialdemokratesch Iddien marginaliséiert. Dëse Changement huet dozou gefouert, datt dës Iddien opgi goufen, an duerch eng méi antisozial „laissez-faire“ Politik ersat gi sinn. Zu Lëtzebuerg waren zu dëser Zäiteng Rei politesch aktiv Leit op der Sich no engem neie politeschen Doheem lénks vun der Sozialistescher Partei (LSAP). Dëst huet 1994 zur Grënnung vun Nei Lénk gefouert, déi aus fréiere Membere vun der Kommunistescher Partei Lëtzebuerg (KPL), Sympathisanten a Sympathisantinnen a Membere vun der Véierter Internationaler (Trotskisten), Gewerkschaftler, Feministinnen an anere bestanen huet.
Bei de Wale vun 1994 huet Nei Lénk mat der KPL ëm de lénke Vote konkurréiert, doduerch huet keng vun deenen zwou Parteien e Sëtz an der Chamber kritt. Fir d’KPL war et déi éischte Kéier zënter 1945, datt senet an der Chamber vertruede war.
Grënnung vun déi Lénk (1999)
No der Walnéierlag vun 1994 wéinst der Konkurrenz tëscht Nei Lénk an der KPL, ass 1999 e neie politesche Mouvement entstanen. déi Lénk goufen net als Koalitioun tëscht Nei Lénk an der KPL gegrënnt, mee als nei Beweegung, déi d’Lénk eenege sollt. D’Grënnungsmemberen sinn als Eenzeplersounen vun Nei Lénk an der KPL an déi Lénk bäigetrueden, vun deenen der vill haut, 25 Joer méi spéit nach aktiv sinn.
D’politescht Zil vun déi Lénk war et de Kapitalismus ëmzestoussen a fir eng méiegalitär, méi demokratesch, méi kooperativ a méi mënschlech Gesellschaft ze kämpfen. Si hunn sech géint d’Iwwervermaartung an d’Privatiséierungstendenz gewiert, déi vun den neoliberale Regierunge weltwäit an zu Lëtzebuerg gefuerdert goufen.
Éischt elektoral Erfolleger a Schwieregkeeten (1999-2009)
Fir d’Wale vun 1999 hunn déi Lénk an d’KPL eng gemeinsam Lëschte presentéiert, fir eng erneit Divisioun vum Vote ze vermeiden. D’politesch Messagen vun déi Lénk hu bei de Wieler ugeschloen, a puer Méint no hirer Grënnung ass den André Hoffmann den éischten Deputéierten vun der Partei ginn. Ee Joer méi spéit gouf den Änder Hoffmann och Schäffen zu Esch-Uelzecht an ass dowéinst aus der Chamber ausgetrueden wou hie vum Alyose Bisdorf vun der KPL ersat gouf. Dësen huet, geméis eisem Rotatiounsprinzip, Plaz fir de Serge Urbany gemaach.
Divergenze mat der KPL hunn 2004 zu getrennte Lëschten an bei de Wale gefouert, wat verhënnert huet, datt eng vun deenen zwou Parteien e Sëtz an der Chamber gewanne konnt. Trotz dësem Réckschlag hunn déi Lénk hir Dynamik bäibehalen, andeems si sech op Themen ausserhalb vun der Chamber engagéiert hunn, dorënner d’Campagne géint d’neoliberal EU-Verfassung an d’Mobiliséierung géint déi ultra-liberal Projete vun der lëtzebuergescher Regierung.
Konsolidéierung a Wuesstem (2009-elo)
Bei de Wale vun 2009 hunn déi Lénk hire Sëtz an der Chamber mam André Hoffmann erëmgewonnen. Zënter 2013 hunn déi Lénk konsequent zwee Sëtzer an der Chamber. De Serge Urbany an de Justin Turpel sinn Deputéierte ginn, si sinn fir den David Wagner an de Marc Baum erausrotéiert. Déi aktuell Vertrieder, David Wagner a Marc Baum, si Grënnungsmemberen, déi de Mouvement a seng Wäerter zënter méi wéi zwee Joerzéngten ënnerstëtzen.
An de leschte Joren hunn déi Lénk hire Fokus erweidert fir méi op Ëmwelt- a Klimafroen anzegoen, Ekosozialistesch Iddien hunn esou de Wee an d’Programmer vun déi Lénk fonnt, déi dovunner ausginn, dass eng demokratesch an egalitär Gesellschaft an de soziale Fortschrëtt souwéi Klima- an Ëmweltschutz direkt mateneen zesummenhänken an net eenzel erreecht kënne ginn.
Aktuell Positioun a Perspektive fir d’Zukunft
Haut beschreift déi Lénk hir politesch Positioun als ecosocialistesch, wat hiert Engagement fir sozial Gerechtegkeet a nohalteg Ëmweltverantwortung reflektéiert. D’Partei spillt weiderhin eng aktiv Roll an der politescher Landschaft vu Lëtzebuerg a plaidéiert fir Politicken, déi Gläichheet, Demokratie a Verantwortung géintiwwer der Ëmwelt fuerderen.
déi Lénk hunn d’Erausfuerderunge vun der politescher Fragmentéierung an der neoliberaler Dominanz ugeholl an sinn als resolut Verdeedeger vu sozialen Iddien zu Lëtzebuerg ervirgaangen. Wann d’Partei no vir kuckt, bleift si engagéiert, fir eng méi gerecht a nohalteg Gesellschaft fir jiddereen ze bauen.
